Høgskulen i Volda surfer seg til fleire søkjarar

Kampanjen med namnet ”Surf på dei fire beste åra i livet ditt” har som mål å auke søkjartalet til grunnskuleutdanninga i Volda med 30 prosent.  Satsinga på rekruttering er den største og mest ambisiøse som har blitt gjennomført ved skulen nokon gong, og nye metodar er tekne i bruk for å lukkast. 

Behovet for gode lærarar i skulen er skrikande og høg kompetanse på dette området er svært etterspurt. Likevel er talet på søkjarar til lærarutdanningane i distriktet for lavt. Dette ønskjer Høgskulen i Volda å gjere noko med. Da held det ikkje berre med ei skildring av tilbodet i ein studiekatalog.

- Folk kan ikkje unngå å leggje merke til surfemannen i tida framover. Han vil fronte alt kampanjemateriell, dukke uventa opp ulike stader i landet og vere tilstades på utdanningsmesser i dei største byane, fortel leiar i rekrutteringskomiteen ved Høgskulen, Dag Atle Lee Eiksund.

Og det er ikkje tilfeldig at det er nettopp surfebrettet som er vald som raud tråd. Lee Eiksund fortel at på same måte som surfaren, balanserer læraren mellom alt som skjer – han er sterk og smidig. Fire år i Volda gjer vidare at lærarstudenten vil surfe på ei bølgje av solid kunnskap og gode opplevingar seinare i livet.

Kampanjen har også ei eiga nettside www.blilærar.no, der ein blant anna kan vinne ei gratis draumehelg i Volda.